साविक विजेता लुम्बिनी लायन्स नेपाल प्रिमियर लिग (एनपिएल) को प्लेअफमा पुग्ने पहिलो टोली बनेको छ। बिहीबार कर्णाली याक्सलाई ४ विकेटले पराजित गर्दै लुम्बिनीले शीर्ष चारमा स्थान सुरक्षित गरेको हो।
कीर्तिपुरस्थित त्रिवि क्रिकेट मैदानमा कर्णालीले दिएको १०६ रनको लक्ष्य लुम्बिनीले १६.४ ओभरमा ६ विकेट गुमाएर पूरा गर्यो।
यो जितसँगै लुम्बिनीले ६ खेलबाट ९ अंक जोडेको छ। ऊ अंकतालिकाको शीर्ष स्थानमा उक्लिएको छ। लिग चरणको एक खेल बाँकी रहँदै लुम्बिनीले प्लेअफमा स्थान पक्का गरेको हो।
१०६ रनको सामान्य लक्ष्य पछ्याएको लुम्बिनीले सुरुवात भने राम्रो गर्न सकेन। मार्क वाटले दोस्रो ओभरमा ओपनर आसिफ शेखलाई १ रनमा एलबीडब्लू आउट गरे। चौथो ओभरको अन्तिम बलमा वाटले कप्तान रोहित पौडेललाई पनि १ रनमै पवेलियन फर्काए।
रोहित आउट हुँदा लुम्बिनीले १४ रन बनाएको थियो। त्यसको तीन बलपछि सन्दीप जोरालाई पवन सर्राफले ४ रनमा आउट गरेपछि लुम्बिनी १९ रनमा तीन विकेट गुमाउने अवस्थामा पुग्यो।
त्यसपछि डार्शी सर्ट र निरोशन डिकवेलाले चौथो विकेटका लागि ४१ रनको साझेदारी गर्दै इनिङ्स सम्हाल्ने प्रयास गरे। डिकवेला १३ बलमा १६ रन बनाएर नवौँ ओभरको पहिलो बलमा आउट भए। उनलाई मार्क वाटले बिपिन शर्माको हातबाट क्याच गराए। चौथो विकेट गुमाउँदा लुम्बिनीले ६० रन बनाएको थियो।
पाँचौँ विकेटका लागि सर्टअ र दिलीप नाथले १९ रनको साझेदारी गरे। ३४ बलमा ६ चौका र १ छक्कासहित ४६ रन बनाएका सर्ट १४औँ ओभरको चौथो बलमा हुसेन तलतको बलमा आउट भए। उनी अर्धशतकको नजिक पुग्न नसके पनि लुम्बिनीका लागि सर्वाधिक रन बनाउने ब्याटर बने।
त्यसपछि दिलीप नाथले जिम्मेवारी सम्हाले। उनले शमीम हुसेनसँग छैटौँ विकेटका लागि १८ रन जोडे। शमीम ५ रन बनाएर १६औँ ओभरको अन्तिम बलमा आउट भए। त्यसपछि नाथले रुबेन ट्रम्पलम्यानसँग अविजित १० रनको साझेदारी गर्दै टोलीलाई जित दिलाए। नाथले २७ बलमा ४ चौकासहित अविजित २८ रन बनाए। ट्रम्पलम्यान २ रनमा अविजित रहे।
लुम्बिनीको जितमा डार्शी सर्टले ४६ र दिलीप नाथले २८ रनको योगदान दिए।
कर्णालीका बलर मार्क वाटले उत्कृष्ट प्रदर्शन गर्दै ४ ओभरमा १२ रन खर्चेर ४ विकेट लिए। पवन सर्राफ र हुसेन तलतले समान १ विकेट लिए पनि टोलीलाई जित दिलाउन सकेनन्।
यसअघि टस जितेर पहिले ब्याटिङ गरेको कर्णाली १९.२ ओभरमा १०५ रनमा अलआउट भएको थियो। उसका लागि सोमपाल कामीले २८ र हुसेन तलतले २४ रन बनाएका थिए।
लुम्बिनीका बलरमध्ये डार्शी सर्ट, अभिषेश गौतम, किशोर महतो र रोहित पौडेलले समान २ विकेट लिएका थिए।
यो हारसँगै कर्णालीको प्लेअफ यात्रा कठिन बनेको छ। पाँच खेलबाट ४ अंक जोडेको कर्णालीले बाँकी खेल जितेर मात्र प्लेअफमा पुग्ने अवस्था छैन। त्यसका लागि विराटनगर किंग्स र चितवन राइनोजले पनि आफ्ना बाँकी खेलमा पराजय बेहोर्नुपर्नेछ भने रनरेटमा पनि कर्णाली अघि रहनुपर्नेछ।
